मिडियाबाजी डटकम लमजुङ — लमजुङको मेमेपोखरीबाट फर्किने क्रममा लेक लागेर मृत्यु भएका एक दम्पतीको शव ४ दिनपछि आइतबार हेलिकोप्टरमार्फत सदरमुकाम ल्याइएको छ । सदरमुकाम बेंसीसहरबाट करिब सााढे १ दिनको पैदलमा पुगिने उक्त ठाउँबाट सदरमुकामसम्म शव ल्याउन गाह्रो भएपछि हेलिकोप्टरबाट उद्दार गरिएको प्रहरीले जनाएको छ ।
मेमेपोखरी घुमेर फर्किने क्रममा सर्लाहीको लालबन्दी नगरपालिका १२, पत्थरकोटका २७ वर्षीय बुद्धिमान योञ्जन र उनकी श्रीमती लमजुङको बेंसीसहर नगरपालिका १०, साँधुकी २६ वर्षीया शर्मिला तामाङको लेक लागेर असोज १९ गते दसैं टीकाको राति मृत्यु भएको प्रहरीले जनाएको छ । दोर्दी र मर्स्याङ्दी गाउँपालिकाको सीमा क्षेत्र करिब ३ हजार ९ सय मिटर उचाइको च्यार्बो भन्ने ठाउँबाट आइतबार दिउँसो ३ बजेतिर शव निकालिएको उक्त काममा खटिएका इन्सपेक्टर विष्णु विकले बताए ।
उनका अनुसार सकुशल उद्दार गरिएकामध्ये बेंसीसहर नगरपालिका–१०, साँधुका अन्दाजी १८ वर्षीय करण तामाङ (शर्मिलाको काकाको छोरा)को मेडिकल कलेज भरतपुरको आईसीयुमा उपचार भइरहेको छ । दसैंको बेला ऐतिहासिक पर्यटकीय मेमेपोखरी गएर फर्किने क्रममा लेकाली क्षेत्रमै दम्पत्तिको मृत्यु भएको हो ।
डीएसपी प्रकाश श्रीमलका अनुसार दसैंको टीकाको दिन बुधबार मेमेपोखरीबाट फर्किंदै गर्दा बाटोमा हाईअल्टिच्युट (लेक लाग्ने) समस्या भएपछि योञ्जन गम्भीर बिरामी भएका थिए । अत्यधिक पानी परिरहेको अवस्थामा गम्भीर बिरामीलाई उद्दारका लागि हारगुहार गर्दै मोबाइल नेटवर्क खोज्दै हिँडेका श्रीमती तामाङले पनि त्यहीँ ज्यान गुमाएकी थिइन् ।
करिब ४ हजार मिटर आसपास लेक जुम्रोडाँडा क्षेत्रमा ढलेका तामाङ भोलिपल्ट बिहीबार मृत भेटिएका थिए । श्रीमती तामाङ हराइरहेका थिए । प्रहरी, सेना र स्थानीयले खोज्ने क्रममा श्रीमानको शव भएको ठाउँबाट करीब १५ मिनेट तल शनिबार मध्याह्नतिर श्रीमतीको शव फेला परेको डीएसपी श्रीमलले बताए ।
लमजुङको दोर्दी र दूधपोखरी गाउँपालिकाको सिरानमा पर्ने मेमेपोखरी पुग्न लमजुङ सदरमुकाम बेंसीसहरबाट कम्तीमा ३ दिन लाग्छ । मेमेपोखरीबाट करिब साढे १ दिन हिँडेपछि आइपुग्ने ठाउँमा शव फेला परेको प्रहरीले जनाएको छ । नेपाल प्रहरी, नेपाली सेना र स्थानीयले शव निकालेर केही तल ल्याए पनि त्यसपछि ल्याउन नसकिएपछि हेलिकोप्टर ल्याइएकझ प्रहरीले जनाएको छ ।
मेमेपोखरी घुम्न शर्मिलाका बुबा, शर्मिलाका आफ्नै भाइ र काकाको छोरा पनि गएका थिए । करिब साढे १ दिनको बाटो पार गर्ने क्रममा ३ जनाले अगाडि बास खोज्न जाने सल्लाह भएपछि श्रीमान् श्रीमती पछि रहेर विस्तारै आउँदै थिए ।
त्यही बेला श्रीमानलाई लेक लागेपछि यसबारे सूचना दिन र हारगुहार गर्न डाँडाकाँडा खोज्दै हिँडेर मोबाइलमा सम्पर्क गर्न गएकी श्रीमती रातको समय आफै अल्मिलएपछि सम्पर्कविहीन बनेकी थिइन् । असोज १६ गते लेकतर्फ गएका उनीहरु नवमीका दिन मेमेपोखरी पुगेको र दशमीको दिन फर्किंदै थिए ।
