१.दुनियाँ सबै हिँड्दा रहेछन् रुप बालेर
आफू हिडेको छु यो दिल खुब बालेर
यहाँ मान्छे मारेर मान्छे मन्दिर पस्छ
चोख्याउन आफुलाई धुप बालेर।
२.नदिनाला बेचेपछी बगान बेचेपछि
देश अझै खोक्रो बन्यो जवान बेचेपछि
सधैं मागेर देश चलाउँछु भन्नेहरूलाई
थाहा होला कसरी चल्छ इमान बेचेपछि।
३.रमाएन कहिल्यै कसैको खती देखेर
मन लोभिदैन कसैको सम्पति देखेर
थाहा छ जन्मले मृत्यु बोकेको सत्य
जल्दैन यो मन कैयौंको प्रगति देखेर।
४.आँखा चिम्लिएर पोखेको लाजका कुरा
कपाल माथी सिउरिदिएको ताजका कुरा
भुलेर पनि कसै सामु नखोल्नु है प्रिया
हामी बिचका गोप्य कामकाजका कुरा।
५.देखेपछी सुन्दरता अझै खास लाग्यो
जस्तो कि त्यो माधुर्य मधुमास लाग्यो
नियन्त्रणमा छैन भन्छौ अचेल जवानी
जबदेखि यो पिरतिको बतास लाग्यो।
प्रवेश पाण्डे ‘प्रसून’ धादिङ
