भदौ २८ तुलसीपुर / तुलसीपुरमा भोलिदेखि विद्यालय बस संचालन हुने भएका छन । कोरोनाको संक्रमण दर कम भए संगै उपमहानगरले भदौ २२ गते विद्यालय संचालन गर्न दिने तर विद्यालय बस संचालन गर्न नपाउने निणर्य गरेको थियो । तर विद्यालय बस चल्न नदिने निणर्यको चौतर्फी आलोचना भएपछि उपमहानगरले भोलिदेखि विद्यालयलाई स्कुल बस चलाउन दिने निणर्य गरेको हो ।
विद्यालय बस संचालन नहुँदा टाढा-टाढाका विद्यार्थीलाई विद्यालय पुग्न समस्या भएको , सार्वजनिक बस प्रयोग गर्दा झन जोखिम बढ्ने भएको चौतर्फी दवावपछि नगरले विद्यालय बस चल्न पाउने निणर्य गरेको हो । नगर शिक्षा शाखाको सोमबार (आज) बसेको बैठकले स्वास्थ्य सुरक्षाका लागि आवश्यक मापदण्डको पूर्ण पालना गरी भोलि देखि विद्यालय बस संचालन गर्न दिने भएको छ ।
