मिडियाबाजी डटकम काठमाडौं ,चैत २६। धादिङ जिल्लाको थाक्रेमा अवस्थित आहुति युवा क्लबले नयाँ वर्ष २०८० को शुभकामना आदानप्रदान तथा वनभोज कार्यक्रम आयोजना गरेको छ।
२५ गते शनिबार आयोजित कार्यक्रममा नेत्रराज पौडेल प्रमुख आतिथि र बिषेश अतिथिका रुपमा थाक्रे गाउँपालिका उपाध्यक्ष यन्त्र बहादुर थापा (जिन्दगी)को उपस्थिति रहेको थियो। कार्यक्रमको सभापतित्व क्लबका अध्यक्ष चिरन रेग्मीले गरेका थिए। कार्यक्रममा विभिन्न क्षेत्रका व्यवसायीहरू, राजनैतिक पार्टीका प्रतिनिधिहरू ,विभिन्न क्षेत्रमा आवद्ध व्यक्तित्वहरू, साहित्यकार, कलाकार,पत्रकार,समाजसेवी तथा स्थानीय जनप्रतिनिधिहरूको बाक्लो उपस्थिति रहेको थियो।
कार्यक्रममा भ्वाइस अफ नेपाल सिजन-४ का प्रतियोगि सविन लामा,रजनी लामा ,उत्सव लामा लगायत स्थानीय कलाकारहरूको विभिन्न सांगीतिक प्रस्तुतिहरू रहेको थियो।’फुटेर होइन जुटेर अघि बढौं’ भन्ने नाराका साथ आयोजित उक्त कार्यक्रममा बोल्दै प्रमुख अतिथि पौडेलले नव वर्ष २०८० को शुभकामना सहित सामाजिक एकता र विकासमा कुनैपनि पार्टी र व्यक्तिवादी नभई सँगै मिलेर अगाडि बढ्नुपर्ने बताए ।
कार्यक्रमा सम्मानित खेलाडीहरूको सामुहिक तस्बिर:-
कार्यक्रमका विशेष अतिथि थापाले शुभकामना सहित स्थानीय स्वरोजगार मूलक कार्यक्रमहरू हुनुपर्ने कुरालाई विशेष जोड दिएका थिए। कार्यक्रममा थाक्रे वडा नम्बर ७ बाट विभिन्न खेलमा जित हासिल गरेका स्थानीय र आहुति युवा क्लबद्वारा विभिन्न खेल खेलेका करिब दुई दर्जन भन्दा बढी खेलाडीहरूलाई खादा र सम्मान पत्रद्वारा सम्मान गरिएको थियो। कार्यक्रमको सञ्चालन सुजन थापाले गरेका थिए ।
